Kamp for arbeidsplassar

(NPK-NTB): Ni organisasjonar held onsdag ei politisk markering der dei krev at oljeminister Tord Lien (Frp) gjer meir for å bevara arbeidsplassar og kompetanse i oljenæringa.
Markeringa blir halden utanfor oljemuseet i Stavanger onsdag kveld. Hovudparolen er «Norge trenger oljeindustrien!»
LO, YS, UNIO og ei rekkje frittståande organisasjonar står saman bak arrangementet, der også Lien sjølv kjem for å svara på kva regjeringa gjer for næringa.
På vegner av nesten 400.000 medlemmer krev organisasjonane handling frå styresmaktene for å sikra arbeidsplassar og verdfull kompetanse i ei næring Noreg treng i lang tid framover, heiter det i ei pressemelding.
Stavanger-ordførar Christine Sagen Helgø kjem, og Karl Eirik Schjøtt-Pedersen, som er administrerande direktør i Norsk olje og gass, skal snakka om kva oljeindustrien har å seia framover.
Den norske oljenæringa er for tida både ramma av eit kraftig prisfall på olje og ein venta nedgang i investeringane på norsk sokkel. Samla har dette skapt stor uvisse og ført til permisjonar og oppseiingar i oljenæringa, først og fremst i fylka på Sør- og Vestlandet. (©NPK)