Kan kutte tilsette og få stønad

NPK-NTB: Stortinget vil tysdag vedta ei kontantstønadsordning for bedrifter. Fleirtalet vil ikkje nekte bedriftene å utbetale utbyte eller å seie opp folk, ifølgje NRK.
Ifølgje har regjeringspartia under forhandlingane med Ap, Frp, Sp og SV i all hovudsak vorte samde om å vedta modellen som finansminister Jan Tore Sanner (H) og næringsminister Iselin Nybø (V) la fram torsdag førre veke.
Forhandlingane gjekk føre seg til seint måndag, og vil bli ferdigstilte tysdag formiddag før innstillinga går til røysting i Stortinget.
I ordninga vil mesteparten av dei uunngåelege utgiftene til bedriftene med minst 30 prosent inntektsfall på grunn av koronautbrotet bli dekte, og bedrifter som er pålagde av staten å stengje, får mest.
Finansminister Jan Tore Sanner har sagt at ordninga kan koste rundt 20 milliardar kroner i månaden.
Delar av venstresida har teke til orde for eit forbod mot utbetaling av utbyte og å nekte bedriftene å betale ut utbyte, men ifølgje NRK har dei ikkje fått gjennomslag for dette i forhandlingane.
I staden kjem Stortinget med ei oppmoding til mottakarane om å ikkje gi utbyte, og det kjem truleg òg ei formulering der det blir oppmoda om at bedriftene bør unngå oppseiingar i stønadsperioden.