Kommunane låner meir på Børsen

(NPK): Kommunane tok opp meir enn dobbelt så mykje i børsnoterte lån i 2015 som året før.
Til saman vart det børsnotert nye kommunale lån til ein samla verdi av 13,1 milliardar kroner i fjor, går det fram av tal som Kommunal Rapport har fått frå Oslo Børs. Det er over dobbelt så mykje som året før, da kommunane børsnoterte lån for 5,5 milliardar kroner.
Kommunane og fylkeskommunane har no ei samla børsgjeld på 44 milliardar kroner. Dei største låntakarane er Oslo, Trondheim, Asker, Stavanger og Bergen, som saman står for over 40 milliardar i børsnoterte lån. I 2015 melde elles Sarpsborg, Tromsø, Bærum, Lenvik og Lillehammer seg på, og på nyåret har Fredrikstad og Nord-Trøndelag tatt opp børsnoterte lån.
– Tilstrøyminga av nye kommunelån har aldri vore så stor som no. Mykje tyder på at fleire kommunar er på veg, skriv kommunikasjonssjef Geir Harald Aase ved Oslo Børs i ein e-post til Kommunal Rapport.
Børsnoterte lån vil seie at kommunane tar opp lån i form av børsnoterte sertifikat eller obligasjonar, verdipapir som kan kjøpast og seljast på Oslo Børs. Dei børsnoterte låna blir billegare for kommunane fordi det er fleire potensielle kjøparar på Børsen.
Ifølgje Statistisk sentralbyrå hadde kommuneforvaltinga ei samla bruttogjeld på 406 milliardar kroner i 2014. Av dette var 292 milliardar lån, 74 milliardar obligasjonar og 39 milliardar sertifikat og statskassevekslar. (©NPK)