Krevjande å kutte straumbruk i bygg

(NPK-NTB): Det er mogleg å redusere straumforbruket i bygg med ti terawattimar innan 2030, men det vil krevje omfattande effektiviseringstiltak.

Målet om ti terawattimar redusert straumbruk i bygningsmassen, som vart lagt fram i handlingsplanen til regjeringa for energieffektivisering i fjor, betyr ein reduksjon på over 11 prosent frå i dag til 2030.

Ein gjennomgang NVE har gjort på oppdrag for Energidepartementet, viser at mangel på informasjon, kunnskap og tid gjer målet krevjande å nå.

– Samtidig er det viktig å erkjenne at fleire av tiltaka kan vere kostbare på kort sikt, seier fungerande direktør Ane Brunvoll i NVE.

Sintef har gjort ein analyse som ser på kostnader for energitiltak i både nye og eksisterande bygg. Den viser at økonomisk støtte på mellom fire og fem milliardar kroner per år kan utløyse investeringar som vil bidra til å nå målet.

– Effektivisering i bygningsmassen styrkjer kraftbalansen ved å redusere effektbehovet på kalde vinterdagar når behovet er størst. Og energieffektivisering bidreg til mindre naturinngrep fordi det avgrensar behovet for ny arealkrevjande kraftproduksjon, seier Brunvoll.

(©NPK)