KrF opnar for å diskutere turistskatt

NPK-NTB: For to år sidan sa fleirtalet på Stortinget nei til besøksavgift, også kalla turistskatt. Både Ap og Sp har snudd i saka, og no er òg KrF på glid.
Det skjer etter at Linda Hofstad Helleland i Høgre opna for å diskutere ei lokal besøksavgift i kommunar som blir belasta med mange turistar, skriv .
Næringspolitisk talsperson Steinar Reiten i KrF seier partiet held seg til regjeringsplattforma og reiselivsmeldinga som kom for to år sidan. Ho seier eit klart nei til ein nasjonal turistskatt.
– Til liks med Høgre er vi snart i ein prosess med å skrive nytt partiprogram før valet i 2021. Eg har gjort meg ein del tankar rundt dette med turistskatt utan at det førebels er forankra i partiet, seier han til avisa.
Reiten peikar på at det kan bli aktuelt å vedta lovendringar som gjer det mogleg å etablere ei besøksavgift innanfor det kommunale sjølvstyret.
– På stader der næringa og kommunen blir samde, kan ein sjå for seg ei avgift som eksempelvis hotell, campingplassar og cruisereiarlaga får i oppdrag å belaste gjestene som krone for krone går tilbake til næringa for å heve kvaliteten på reiselivsproduktet.
Reiten meiner det kan bli ein vinn-vinn-situasjon for både kommunen og reiselivet.