Leverte første heilelektriske katamaran

Maritime Partner i Ålesund har levert sin første passasjerkatamaran for rutetrafikk som berre skal basere seg på batteridrift.

Det dreiar seg om ein båt av typen Alusafe Cat 18 med plass til 75 passasjerar. Båtruta er omlag 22 kilometer lang, og får ein ladestasjon undervegs.

Passasjerkatamaranen til Moskenes Shipping er teikna av skipsdesignar Ola Lilloe-Olsen og skal gå i rute på Reinefjorden i Lofoten. Framdriftsanlegg og batteripakke blir levert av ABB. Båten skal ha ein marsjfart på 12 knop.

Det er tidlegare opplyst at verdien på avtalen er kring 40 millionar kroner.

Maritime Partner har ikkje levert rekneskapen for 2023, men dagleg leiar Torstein Heggstad fortalde til Nett No tidleg i år at han rekna med minustal også for fjoråret.

Båtbyggjarfirmaet i Ålesund har fleire år med underskot bak seg, men fekk ved starten av året inn ny kapital og Volstad-familien som største eigarar.