Låglønte ramma av pensjonsunntak

(NPK-NTB): Arbeidsgjevarar i bedrifter med lågt lønnsnivå er dei flittigaste brukarane av unntak som gir lågare pensjonsutgifter, ifølgje Aftenposten.
Lova om obligatorisk tenestepensjon inneheld mange små smotthol som arbeidsgjevarane kan bruke for å slanke pensjonsrekninga, skriv avisa. Og mykje tyder på at det særleg er i bransjar med låg lønn og pensjon at arbeidsgjevarane sparer så mykje som mogleg på pensjonen.
Regelverket seier at arbeidsgjevarane ikkje treng å betale inn pensjon til tilsette under 20 år, tilsette som jobbar i bedrifta i mindre ein 12 månader og deltidstilsette med under 20 prosents stilling. Dessutan kan ein la vere å betale pensjon for éin gonger grunnbeløpet på 90.000 kroner.
Særleg sistnemnde vedtak slår hardt ut, ifølge berekningar gjort av pensjonsekspertane i aktuarselskapet Actecan. Og det rammar dei med lågast lønn hardast. For ein erfaren butikktilsett med rundt 400.000 kroner i årslønn, vil minimumsordninga med innbetaling på 2 prosent av lønna, og ingen pensjonsbetaling for grunnbeløpet, bety ein forskjell på 15.000 kroner i årleg pensjon.
Tala blir bekrefta av ein rapport LO-forbundet Handel og Kontor har bestilt i forkant av lønnsoppgjeret.
– Rapporten viser at gjennomsnittssatsen på pensjonssparing for denne gruppa arbeidstakarar ligg under 2 prosent fordi dei ikkje får pensjonssparing på all inntekt. Jo lågare lønn, jo lenger unna er ein 2 prosents pensjonssparing, seier leiar Trine Lise Sundnes i Handel og Kontor.