Mange uroa for sikkerheten i oppdrett

(NPK): I ei fersk HMS-undersøking i havbruket meiner 29 prosent at omsynet til produksjon går føre tryggleiken. Det er i store operasjonar som avlusing at tryggleiken oftast blir sett på prøve.

I HMS-undersøkinga frå havbruket som vart lagt fram av Sintef Ocean onsdag, oppgir seks av ti tilsette at dei er bekymra for at forhold ved arbeidsmiljøet kan påverke helsa deira negativt. Like mange har opplevd nestenulykker dei siste to åra, skriv Sintef i ei pressemelding.

Tilsette frå 160 ulike selskap, i alt 1283 personar, har svart på undersøkinga. Det er nær ei tredobling frå førre undersøking, som vart gjord i 2016.

– Å førebyggje arbeidsrelatert fråvær og fråfall i næringa er i alles interesse, og vi tenkjer at rapporten er nyttig for oppdrettsselskap, reiarlag, leverandørar og styresmakter, seier Trine Thorvaldsen i Sintef Ocean, som har leidd arbeidet med HMS-undersøkinga. Arbeidet er finansiert av Forskingsfinansieringa til fiskeri- og havbruksnæringa (FHF).

I undersøkinga i år er fleire yrkesgrupper inkludert enn i førre undersøking, til dømes leverandørar, setjefiskaktørar, og tilsette på brønnbåtar. 76 prosent av svara kom frå tilsette i oppdrettsselskap.

Trass at fleire opplever risiko og ubehag, oppgir ni av ti at dei trivst på jobb. 90 prosent trekkjer fram gode kollegaer/arbeidsmiljø som årsaka til trivsel, deretter følgjer interesse for havbruk og jobbe ute/i naturen. Variert arbeid, god lønn og givande jobb blir også trekt fram.

– Det er i store operasjonar som avlusing at arbeidspress og risikable situasjonar blir særleg tydelege. Det kan nok forklare ein del av funna om tryggingsklima i undersøkinga, seier Thorvaldsen.