Meir kontroll av tilhengjarar

(NPK): Vegvesenet intensiverer no kontrollen av tilhengjardrag på tunge køyretøy etter at det er oppdaga fleire alvorlege rustskadar og svekte drag.
I etterkant av ulykka i Skatestraumtunnelen i Nordfjord, der ein tilhengjar lasta med bensin losna og starta ein stor brann, har Statens vegvesen avdekt fleire tilfelle av skadar på tilhengjardrag.
– Vi ser svært alvorleg på dette. Skadepotensialet ved ein svikt i tilhengjardraget er stort. Ein tilhengjar på fleire tonn som misser forbindelsen til trekkjande bil under køyring kan gjere enorme skadar på andre trafikantar, seier avdelingsdirektør Jon Molnes i Statens vegvesen i ei pressemelding.
No skal Vegvesenet framover auke kontrollen av tilhengjarar ute på vegen.
– Det vil i hovudsak vere snakk om å sjå etter rust og sprekkdanningar og slitasje, seier Molnes. (©NPK)