Milliardar i lånegarantiar til havvind

(NPK-NTB): Eksportfinansiering Noreg (Eksfin) garanterer for 90 prosent av kraftselskapet Iberdrolas lån på 500 millionar euro for å byggje ut ein havvindpark i Nordsjøen.

Totalverdien på lånet ligg på omtrent 5,7 milliardar norske kroner. Eksfin garanterer for fem milliardar kroner, og avtalen fører Eksfins samla havvindfinansiering opp i 20 milliardar kroner.

– Tett samarbeid med leiande internasjonale havvindutbyggjarar er viktig for utviklinga av den norske havvindklyngja. Transaksjonen er også med på å styrkje Eksfins posisjon innan fornybar energi og opnar nye moglegheiter for norske eksportørar, seier Tone Lunde Bakker, administrerande direktør i Eksfin.

Det spanske kraftselskapet Iberdrola kjøper transformatorplattform frå Aker Solutions og installasjonstenester frå Seaway 7. Havvindparken East Anglia THREE skal stå i Nordsjøen.

Iberdrola vil også kjøpe leveransar til dei andre havvindutbyggingane til selskapet frå andre norske eksportørar.

(©NPK)