Nortura må kutte 300 stillingar

NPK: Landbrukssamvirket Nortura varsla i ei børsmelding torsdag at dei reknar med å få eit svakare resultat i 2017 enn venta. Dermed må selskapet ty til sparetiltak og nedbemanning.
– Samanlikna med ambisjonane for selskapet ser vi ei svekking i resultatet. Innteninga i andre halvår i fjor er i utakt med dei ambisjonane vi har. No har vi behov for å setje i gang tiltak for å rette kursen oppover i eit høgt tempo, seier konsernsjef Arne Kristian Kolberg til Dagens Næringsliv.
Konsekvensen av den lågare innteninga er at selskapet dei neste tre åra må slanke kostnadene internt ved å redusere talet på tilsette med i underkant av 300. Nortura har i dag rundt 5.500 tilsette ved 34 produksjonsanlegg over heile landet.
– Omstillingsprogrammet rammar så mange av dei tilsette at vi hadde eit behov for å gå ut og varsle om det svekte resultatet for å ha eit moment som viser at det er nødvendig med omstilling, seier Kolberg.
Nedbemanninga kjem til å ramme administrative stillingar og støttestillingar i kjerneverksemda til Nortura over heile landet, ifølgje Kolberg.
Samvirket Nortura er eigd av 18.800 egg- og kjøttprodusentar og står bak merkevarene Gilde, Prior, Terina, Thulefjord, Joka og Alfathi.