Nytt håp for Tine-anlegg på Sunnmøre

Tine vil ha meir tid på seg til å vurdere framtida til anlegga sine i Ørsta og Tresfjord. Det kjem fram i ei pressemelding onsdag. 

I fjor gjekk selskapet ut med at dei ville legge ned verksemdene med kring 70 tilsette til saman. 

«TINE har besluttet å bruke mer tid på å finne den mest effektive og langsiktige løsningen for anleggsstrukturen for blokk- og spesialost. Tidslinjen for avviklingen av disse to anleggene blir derfor forskjøvet», heiter det i meldinga frå Tine. 

Konserndirektør Shaher Yar Khan for forsyningskjeden i Tine opplyser at dei har oppdaga at «kompleksiteten er stor» i arbeidet med å konkretisere investeringar i Verdal og Byrkjelo. 

Tine ventar å ha ei avgjerd på bordet innan utgangen av 2026.