Bygginga av havforskingssenteret Ocean Space i Trondheim bør utsetjast til seinast 2025, foreslår regjeringa. Ap i Trøndelag krev møte med partileiinga.

Løyvinga til prosjektet blir redusert med 405 millionar kroner i år, foreslår regjeringa i revidert nasjonalbudsjett.

Årsaka er ei betydeleg og aukande uvisse om kostnadene ved prosjektet, mellom anna på grunn av auka materialkostnader.

– Prosjektet består for ein stor del av stål og betong, som har hatt ein betydeleg prisvekst det siste året, står det.

Senteret skal vere eit internasjonalt leiande kunnskapssenter for havromteknologi.

I tida fram til oppstart skal prosjektet omarbeidast, kostnadene skal vurderast, og moglege kutt skal identifiserast, opplyser regjeringa.

Moglegheita for oppstart neste år skal vurderast i statsbudsjettet for 2023, heiter det vidare. Prosjektet er likevel allereie i gang.

– Ocean Space Centre er eit prosjekt som vart godkjent for finansiering av Stortinget for berre eit halvt år sidan, og prosjektet er i gang. Vi har byrja å inngå kontraktar og flytte folk. Då er dette eit seint stopptidspunkt, seier Olav Bolland, leiar for styringsgruppa, til Nidaros.

Utsetjinga skaper sterke reaksjonar i Trøndelag, også frå Arbeidarpartiets eigne. Ordførar i Trondheim, Rita Ottervik, kallar det eit «frykteleg dårleg» forslag.

– Eg har allereie bede om møte med partileiinga, for dette er alvorleg, seier Ottervik til Adresseavisen.

Fylkesordførar Tore O. Sandvik er rasande.

– Dette er fullstendig uforsvarleg. Eg vart rasande då eg fekk høyre det. Å utsetje Ocean Space er ei feilvurdering som Stortinget no må rette opp i, seier han.

Ei rekkje organisasjonar reagerer på avgjerda til regjeringa.

Tekna er svært skuffa, og president Lars Olav Grøvik seier det er ekstra oppsiktsvekkjande sidan havlaboratoria skal støtte opp under havvindsatsinga til regjeringa som vart lansert onsdag.

– Her slår regjeringa beina under eigne ambisjonar for havområdet med auka fornybar energiproduksjon, eksport og vekst i havnæringane og bedrifter langs heile kysten, seier han.

Rederiforbundets leiar Harald Solberg synest avgjerda er ubegripeleg.

– Ei slik utsetjing kjem uansvarleg seint og kan i verste fall føre til at Noregs leiande rolle blir svekt, seier Solberg.

Senteret kunne gitt Noreg leiarposisjon i omstillinga av havnæringa nasjonalt og globalt, meiner Abelias administrerande direktør Øystein Eriksen Søreide.

– I staden prioriterer altså regjeringa kortsiktige tiltak, samtidig som dei bryt lovnadene frå Hurdalsplattforma, seier han.