Oljefondssjefen: – Trump vil få fart på økonomien

(NPK-NTB): Oljefondssjef Nicolai Tangen meiner USAs nye president, Donald Trump, vil få fart på økonomien. Over halvparten av oljefondet er investert i USA. 

– Det vil bli mindre reguleringar, som vil gjere det enklare å slå saman selskap og drive fram kunstig intelligens. Han vil få mykje meir fart på den amerikanske økonomien, seier Tangen til NRK.

Fondssjefen spår at tiltaka til Trump, vil føre til større økonomisk vekst. På kort sikt er det positivt for aksjemarknaden, men på lengre sikt vil importrestriksjonar kunne trekkje prisveksten opp, trur Tangen.

– Når vi snakkar om Trump, er det viktig å skilje mellom dei reint finansielle konsekvensane og tiltaka som går på samfunnsstrukturen, som det jo er lett å vere usamd i, seier han.

Til liks med då Trump vart valt som president i 2016, har det vore børsoppturar etter at han vart vald igjen i fjor haust. Ei rekke amerikanske bedriftsleiarar er optimistiske til dei kommande fire åra under den republikanske presidenten.

Sjølv om Tangen trur Trump blir bra for Noreg og oljefondet i denne perioden, er han redd for at skiljet mellom USA og Europa vil auke.

– Større vekst i USA, i tillegg til toll og eksportavgrensing, kan vere med på å dra den økonomiske veksten i Europa ytterlegare ned, seier Tangen.

(©NPK)