Oljekrisa pregar framleis norske verft

(NPK-NTB): Etter at oljeprisen fall kraftig i 2014, vart det full stans i bestillinga av nye skip hos norske verft. Åtte år seinare er det framleis stille i bransjen.

Ein gjennomgang Teknisk Ukeblad har gjort, viser at få norskregistrerte skip blir levert av norske verft. Etter oljekrisa gjekk delen skip bygde ved norske verft ned.

Totalt er 695 skip registrerte i Norsk internasjonalt skipsregister (NIS). Hittil i år er ingen av dei nye skipa som har vorte NIS-registrerte, bygde ved norske verft. Dei aller fleste er store, havgåande tank-, bulk-, kjemikalie-, gass- eller bilskip som ikkje kan byggjast i Noreg fordi verfta her er for små.

Årsaka til utviklinga er at før krisa bygde norske verft meir og meir avanserte skip. I dag blir desse bygde i hovudsak i Kina, Korea, Vietnam og andre lågkostland.

– Tala stadfestar det vi har hatt inntrykk av. Det er færre som kontraherer NIS-skip ved norske verft, seier dagleg leiar Ivar Engan i Maritimt Forum.

I 2016 byrja ordrebrøkene å tømmast for skip bestilt før oljekrisa. Dei norske verfta brukte krisetida på å omstille næringa til ekspedisjonscruise og havvind.

Engan håpar at norsk havvindsatsing, særleg på flytande turbinar, kan bidra til betre belegg på verfta.

(©NPK)