Oppbod med sju millionar i gjeld

Sogn og Fjordane tingrett har opna konkurs i Snorre Pet Food AS på Raudeberg i Kinn, melder Sunnmørsposten. 

Selskapet satsa på å lage hundefôr av fiskeavskjer, men har no meldt oppbod til tingretten. 

– Det var eit prosjekt som hadde gode intensjonar, men vi lykkast ikkje i marknadsarbeidet, seier styreleiar Steven Jensen til avisa. 

Gjelda er på sju millionar kroner, og det er verdiar for kring tre millionar i selskapet, viser rettspapira. Produksjonen gjekk føre seg hos bedrifta P. Stave AS, som var mellom fleire lokale eigarar på eigarsida.

Advokat Eirik Hauge er oppnemnd til bustyrar og første skiftesamling er planlagt 26. februar.