Orkla tente 1,7 milliardar før skatt

(NPK-NTB): Matvaregiganten Orkla hadde eit resultat før skatt 1,7 milliardar kroner i tredje kvartal i år, eit fall på rundt 300 millionar kroner frå same periode i fjor.

– Det er oppmuntrande å sjå at dei fleste av selskapa våre har auka driftsmarginane sine, samtidig som dei gjer store investeringar i merkevarebygging og reklame, seier konsernsjef Nils K. Selte i ei pressemelding.

Han legg til at også målingsprodusenten Jotun, der Orkla eig nesten halvparten, hadde eit godt kvartalsresultat, med auka sal og solid driftsresultat.

Omsetninga til Orkla-konsernet i kvartalet var 17,5 milliardar kroner, ein auke på 4,3 prosent. Dette var tredje kvartalet på rad med positiv utvikling.

Orkla består av elleve selskap, mellom anna innan matvarer, matingrediensar, snacks og godteri, kosttilskot, reingjeringsprodukt og personleg pleie. Blant dei kjende merkevarene er Toro, Grandiosa, Stabburet, Nidar og Kims.

Ved årsskiftet hadde Orkla 19.671 tilsette og til saman 114 fabrikkar i 24 land.

(©NPK)