Permitterte som arbeider risikerer straff

NPK-NTB: Nav påpeikar at det kan få alvorlege konsekvensar for tilsette og arbeidsgivar om permitterte jobbar, med eller utan lønn, på rekninga til staten.
Aftenposten har vore i kontakt med fleire permitterte arbeidstakarar som framleis utfører arbeidsoppgåver for å halde bedrifta gåande under koronakrisa, samtidig som dei får betaling frå staten.
Direktør i Nav kontroll Ole Johan Heir seier både arbeidstakarar og publikum sender tips om denne typen utnytting av permisjonsordningane, der permitterte meir eller mindre blir pressa til ein slags dugnad for å redde framtidig jobb.
– Vi følgjer med på dette no, seier Heir, som seier brot på regelverket for permitterte kan medføre straffansvar og tilbakebetaling av pengar, òg om dei skjuler ulønt arbeid.
Kontorsjef Liv-Tove Espedal i Nav minner om at det er eit skilje mellom heil og delvis permisjon, og ved sistnemnde kan det sjølvsagt arbeidast noko.
– Er den tilsette delvis permittert, arbeider vedkommande anten kortare dagar eller færre dagar. Arbeidsgivaren skal betale ut lønn for den tida den tilsette arbeider, påpeikar Espedal i ein e-post.