Prøvar å berge sommarsesongen

(NPK): Jostedalsbreen nasjonalparksenter i Stryn har vore utan både styreleiar og dagleg leiar den siste tida. Onsdag var det ekstraordinært årsmøte for å berge sommarsesongen.
Det har vore krisetilstandar den siste tida ved Nasjonalparksenteret i Oppstryn, der styreleiaren har trekt seg og dagleg leiar ved senteret har vore sjukmeld i lengre tid, fortel NRK.
Onsdag valde det ekstraordinære årsmøtet geologiprofessor og tidlegare direktør ved Naturhistorisk museum i Oslo Arne Bjørlykke til ny styreleiar. Dessutan stemte årsmøtet advokat Roar Berge inn i styret.
Årsmøtelyden drøfta òg arbeidet med den vidare drifta av senteret.
– Vi jobbar med å få på plass nye personar for å sikre drifta. No på vinteren er det ei roleg tid. Booking og slike ting går sin gang. Vi har to tilsette i tillegg til dagleg leiar, men vi er avhengige av å få på plass nytt personale, sa fungerande styreleiar Synnøve Stalheim til NRK før møtet.
Jostedalsbreen nasjonalparksenter er ved sida av Norsk Bremuseum i Fjærland og Norsk breheimsenter i Jostedalen eitt av tre kunnskaps- og opplevingssenter rundt Noregs største isbre. (©NPK)