Rekordbøter til straumselskap

Etter Forbrukartilsynets varsel om rekordbøter til straumselskapet Tinde Energi, meiner forbrukarminister Kjersti Toppe (Sp) bransjen bør rydde opp.

– Eg er glad for at tilsynet følgjer opp dei utfordringane som blir avdekte og slår hardt ned på lovbrot, skriv barne- og familieminister Toppe i ein e-post til Dagens Næringsliv. Ho er også minister for forbrukarsaker.

Fredag varsla Forbrukartilsynet ei bot til Tinde Energi på 3 millionar kroner etter at straumselskapet endra vilkåret til fastpriskundane. Også dagleg leiar i selskapet, Raymond Henriksen, vart varsla om ei personleg bot på 400.000 kroner. Henriksen sjølv seier at vilkårsendringane Tinde Energi har varsla frå nyttår, er marginale.

– Eg meiner også at straumbransjen har ein jobb å gjere med å rydde opp og sørgje for at dei har tilliten til forbrukarane. Eg forventar at alle aktørane i bransjen opptrer ryddig og påliteleg i møtet med forbrukarane i ei tid der mange er urolege for aukande prisar, legg Toppe til.