Rekordhøge naturskadeerstatningar i 2023

(NPK-NTB): Rekordmange naturskadeerstatningar på bygningar og innbu vart melde inn til Norsk Naturskadepool i fjor. Ekstremvêret Hans sette tydelege spor på Austlandet.

Frå 7. til 25. august i fjor vart det meldt inn 6809 forsikringsskadar frå dalane i Innlandet og kommunane på Hadeland og andre kommunar sørover mot Oslo-regionen. Erstatningsbeløpet i Gudbrandsdalen, Hallingdal og Valdres enda på totalt 929,6 millionar kroner fordelt på 2175 melde skadar. Tala er førebelse og kan framleis endrast.

– Forsikringsselskapa og Norsk Naturskadepool er rigga for å handtere store naturskadar, men vi er stadig imponerte over korleis dei ramma, som fekk omfattande skadar på hus og heim, handterte dette. Nokon måtte også vente på fagfolk fordi det mellom anna var knappleik på handverkarar, seier administrerande direktør Ståle Solem Ingebrigtsen i Norsk Naturskadepool i ei pressemelding.

Ekstremvêret Hans førte til både storflaum, skred og stormskadar i august i fjor. Flaumen gjorde større skade enn Vesleofsen i 1995 som var den største registrerte flaumen i historia til naturskadepoolen før Hans.

Dalførene Hallingdal, Gudbrandsdalen og Valdres vart særleg hardt ramma. Gjennomsnittserstatninga i Hallingdal er på nesten ein halv million kroner. Det er høgare enn vanleg for slike skadar. Erstatningane gjeld skadar på bygningar og innbu etter naturskadeforsikringslova. Skadar på mellom anna bilar og båtar kjem i tillegg til naturskadetala.

– Det er viktig at styresmaktene set av ressursar til å førebyggje naturskadar, sjølv om ikkje alle skadar kan unngåast. Førebygging lønner seg, seier Solem Ingebrigtsen.

(©NPK)