Semje i fiskeriforhandlingane

NPK-NTB: EU og Noreg er samde om fiskekvotane for 2018. Det blir auka kvotar for torsk så vel som for nordsjøsild og sei.
Forhandlingane har gått føre seg i Bergen i fem dagar. Fiskeriminister Per Sandberg (Frp) seier seg nøgd.
– Det har vore tøffe forhandlingar, men alle har vore konstruktive. Både Noreg og EU er opptatte av å sikre god forvaltning av dei felles ressursane våre i Nordsjøen og Skagerrak, seier han.
Hovudformålet har vore å få på plass kvotar for bestandar som blir forvalta i fellesskap. Dette omfattar blant anna torsk, hyse, raudspette, kviting og sild i Nordsjøen og Skagerrak. I tillegg har Noreg og EU forhandla om kvotebyte.
Torsk, nordsjøsild og sei utgjer hovudelementa i avtalen:
* Torskebestanden har vore under press i Nordsjøen, men situasjonen har betra seg dei siste åra. Kvoten for 2018 er sett til 43.156 tonn. Den norske torskekvoten er sett til 7.337 tonn.
* Kvoten for nordsjøsild er sett til 600.588 tonn, med ein kvote på 174.171 tonn til Noreg.
* Kvoten for sei er sett til 105.793 tonn, med 55.012 tonn til Noreg.
Kvotane for alle dei tre artane er auka samanlikna med 2017.
Noreg og EU diskuterte også fangst av snøkrabbe, men utan å komme til semje. Noreg nektar EU å fange snøkrabbe i farvatna utanfor Svalbard.