Skal bli lettare å starte gruvedrift

NPK-NTB-Anne Marjatta Gøystdal: – Dette vil vere eit viktig grep for å unngå at prosessar dreg unødvendig ut i tid ved at næringa blir pålagd motstridande krav i løyve, eller at dei same forholda må greiast ut og behandlast i fleire omgangar, seier næringsminister Cecilie Myrseth (Ap) i ei pressemelding.

Ho meiner enklare prosessar også vil redusere risikoen for at det oppstår konfliktar om rettar ved undersøkingar og seinare utvinning.

– Vi vil også gjere det lettare å få sett i gang mineralprosjekt ved å samle løyva til å undersøkje statsminerala, industriminerala og lette metall på ein og same hand.  Mineral har ei aukande strategisk og geopolitisk betydning som komponentar til mellom anna fornybar energi, digital omstilling og rom- og forsvarssektoren. Vi skal utvikle mineralnæringa samtidig som vi tek vare på nasjonale tryggingsinteresser, seier Myrseth.

Samstundes som regjeringa vil gjere det lettare å starte gruvedrift vil den også gi samiske rettshavarar  eit styrkt vern. Det inneber at reglar som gjeld samiske forhold blir utvida frå Finnmark til å gjelde heile det tradisjonelle samiske området.