Slit med berekraftsrapportering

NPK: 1. november i år tredde nye reglar om berekraftsrapportering i kraft i Noreg. Rådgivings- og revisjonsselskapet BDO har gjort ein analyse som viser at dei fleste norske selskap som er lovpålagde rapporteringa frå 2025 førebels svarer dårleg på krava.

Selskapet har gått gjennom berekraftsrapporteringa for 100 selskap i 2023. Medan 7 prosent av utvalet blir vurderte å ha «høg modnad» på berekraftsrapportering, er det 56 prosent som har «låg modnad»

– Det er tredje gongen vi gjer denne analysen. Vi ser ei rørsle i rett retning også i år, sjølv om dei fleste har eit stykke igjen til krava. Forskjellen no, er at reglane er vedtekne som ein del av norsk lov og har tredd i kraft. Selskapa vi har analysert, skal rapportere for 2025. Det er ikkje noko som kjem langt der framme, det skjer no, forklarer Eirik H. Lie, leiar for revisjon i BDO, i ei pressemelding.

Mari Ziesler Andenæs er leiar for berekraftsrapportering i BDO og er tett på selskap som no førebur seg på nye krav. Ho forventa ikkje at alle skulle vere klare i 2023-rapporten.

– Nokre har fleire av dei lovpålagde elementa på plass allereie, medan andre igjen ikkje har publisert berekraftsrapportering, og må byrje frå null, forklarer Andenæs.

Analysen viser at åtte prosent har nemnt klimarisiko i årsmeldinga til styret, og to prosent har talfesta finansielle effektar av klimarisiko.

– Klimarisiko ser ut til å vere ei blindsone. Lovgivinga som gjeld no, krev at styret har eit medvite forhold til klimarisiko og finansielle effektar. Det har dei ikkje i dag, sjølv om dei etter lova må rapportere på det allereie for neste år. Fleire norske bedrifter har sett finansielle effektar av klimarisiko berre den siste tida, åtvarar Andenæs.

Rapporten «CSRD – er norske virksomheter klare» baserer seg på offentleg informasjon, der utvalet er henta frå Kapitals liste over Noregs 500 største selskap etter omsetning i 2023 og utgjer dei 100 minste aksjeselskapa (AS) på denne lista.