Slutt for to serveringsstader

Møre og Romsdal tingrett har onsdag opna konkurs i både Grand Cafe Molde og Publix i Skodje.

Sistnemnte selskap har stått bak drifta av Publixbar, der inntektene har hamna under millionen i åra 2020-2022. To av tre år har også enda med underskot.

Verksemda er innstilt og ti tilsette som har jobba som tilkallingsvikarar, er sagt opp. Retten har fått opplyst at gjelda er på 750.000 kroner og verdiane på kring 300.000 kroner.

Grand Cafe Molde har halde til på Amfi Roseby-senteret og omsett for drygt tre millionar i 2020-2022. I alle desse åra har drifta gått med underskot.

Samla gjeld er på knappe 640.000 kroner og verdiane er anslått til drygt 400.000 kroner.

Så langt i år er det opna konkurs i 92 selskap i Møre og Romsdal. Det er tre fleire enn på same tid i fjor.