Slått av Danmark og Finland på pensjon

Mens nabolanda trumfar, scorar Noreg og Sverige dårlegast på ei stor internasjonal undersøking om pensjonssystem.

– Det var allereie nødvendig med eit betydeleg stykke arbeid for å betra pensjonsutfallet i Noreg, men det siste året har gjort dette endå meir utfordrande, seier presidenten i CFA Society Norway, Erlend Fredriksen i ei pressemelding.

Noreg hamnar på ein 7.-plass på Mercer CFA Institute si liste over pensjonsinntektssystem i 44 land. Samanlikna med nabolanda er det berre Sverige som får dårlegare score på ein 9.-plass.

På toppen tronar Island, med Danmark på ein 3.-plass og Finland på 6.-plass. Ifølgje Fredriksen kjem dette av overgangen frå eit globalt langvarig lågt rentemiljø til høge inflasjonsratar og mangedobling av renter i visse marknader.

Den norske pensjonskommisjonen har uttrykt at pensjonsordninga som gjeld per dags dato ikkje er berekraftig. For å endra dette føreslår dei å auka folkepensjonsalderen, gjera slik at minsteytingar følgjer den generelle velstandsutviklinga og sjå til at uføre er sikra ein rimeleg alderspensjon. Dette kjem likevel ikkje kostnadsfritt.

– Enkeltpersonar har teke på seg meir ansvar for pensjonssparingane sine ei god stund. Midt i høge inflasjonsnivå, stigande renter og større uvisse om økonomiske forhold gjer dei det i eit stadig meir komplekst og endrande miljø, seier Dr. David Knox som er seniorpartnar og hovudforfattar av studien.