Sp-Vedum vil gi over 10 milliardar i skattelette

(NPK-NTB-Steinar Schjetne): Senterparti-leiaren kastar seg inn i konkurransen om å gi dei rausaste skatteløfta før valet. Han vil ha lettar for over 10 milliardar kroner.

– Dei lettane vi kjem til å jobba for, utgjer i overkant av 10 milliardar kroner, seier Senterparti-leiar Trygve Slagsvold Vedum til NTB.

Ved starten på ein valkamp som kan enda i at det raudgrøne fleirtalet får avløysing, varslar Vedum at Sp vil gå inn for nye skatte- og avgiftskutt for å letta situasjonen for arbeidstakarar og bedriftene dei jobbar i.

Pengane hentar han frå noko så sjeldan som eit auka økonomisk handlingsrom på rundt 20–30 milliardar kroner i åra som kjem.

Folk, ikkje formuesskatt

Innretninga på avgifts- og skattelettane partiet ønskjer, skal føra vidare og forsterka den lina Sp førte i regjering:

• Skattelette på inntekt for arbeidsfolk med lågare og mellomliggjande lønningar.
   
• Avgiftslette som grip inn i kvardagen til folk flest.
   
• Skatte- og avgiftsgrep som skal bidra til at fleire unge kjem seg ut i arbeidslivet.

Vedum avviser derimot å fjerna formuesskatten på såkalla arbeidande kapital, men meiner det kan vera rom for å sjå på korleis ein set skatteverdien på driftsmiddel, som traktorar og gravemaskiner.

– Dette er motsatsen til Høgre, som har formuesskatt som hovudprioritet. Eg meiner hovudprioriteten må vera arbeidsfolk, seier Vedum.

Til helga samlar han partifellane til landsmøte i Haugesund. Då går startskotet for den lange valkampen. Sp slit kraftig på meiningsmålingane etter å ha forlate regjeringa i vinter og er nede på 4,9 prosents gjennomsnittleg oppslutning på meiningsmålingane i mars, ifølgje Poll of polls.

(©NPK)