Statkraft sel seg ut i fleire land

(NPK-NTB): Statkraft vil selje seg ut av den landbaserte verksemda si i Nederland og Kroatia og India. Selskapet gjer også endringar i leiinga frå nyttår.

Sala er eit ledd i ein endra strategi der selskapet vil konsentrere seg om framtidige investeringar i færre land for å byggje skala, auke konkurranseevna og styrkje verdiskapinga, heiter det i ei pressemelding.

Som eit ledd til å bidra til ei nullutsleppsframtid ønskjer selskapet å prioritere investeringar i norsk vasskraft og vekse i solenergi, vindkraft og batterilagring i Norden, Europa og Sør-Amerika, og også å satse meir på havvind i Nord-Europa.

Statkraft sel derfor verksemda si innan landbasert vind, solenergi og batteri i Nederland og Kroatia, og vil etter kvart også selje seg ut av vasskraft og solenergi i India.

– Statkraft har bygd ein sterk posisjon som Europas største produsent av fornybar energi og er ein stor aktør i utvalde marknader i Sør-Amerika. Vi har allereie spissa strategien vår for å prioritere kapital til kjerneverksemda vår, og vi fokuserer no investeringane våre på færre marknader, seier konsernsjef Birgitte Ringstad Vartdal i Statkraft.

Som eit ledd i den spissa strategien, vil Statkraft også få ei ny organisering med ny konsernleiing frå 1. januar 2025. Endringane inneber mellom anna at forretningsområdet Nye energiløysingar vil bli avvikla, og konserndirektør for dette området, Jürgen Tzschoppe, forlèt derfor selskapet.

(©NPK)