Straumprisane meir enn halvert i fjor

(NPK-NTB): I 2023 var den gjennomsnittlege kraftprisen i Noreg 64 øre per kilowattime. Det er under halvparten av prisen året før, ifølgje NVE.

Den gjennomsnittlege straumprisen i 2022 var på 163 øre per kilowattime.

– Hovudårsaka til prisnedgangen var lågare gasspris og høgare magasinfylling, spesielt i sørlege Noreg, seier fungerande avdelingsdirektør Ane Torvanger Brunvoll i Noregs vassdrags- og energidirektorat (NVE) i ei pressemelding.

I tillegg var det periodar med mykje uregulerbar produksjon frå vass-, vind- og solkraft på kontinentet og i Norden.

Prisforskjellen mellom dei norske prisområda var likevel stor.

Gjennomsnittleg årspris i Sørvest-Noreg (NO2) var 90 øre per kilowattime, medan han i Søraust-Noreg og Vest-Noreg (NO1 og NO5) var på 76 øre per kilowattime. Årsprisen i desse områda var uansett meir enn halvert samanlikna med 2022.

I Midt- og Nord-Noreg var prisen i fjor noko høgare enn i 2022, men her var prisane likevel lågare enn i Sør-Noreg.

(©NTB)