Straumprisen gjorde eit hopp då ny kraftlinje opna

Torsdag klokka 15 opna den nye straumkabelen over Sognefjorden. Om lag samtidig gjorde straumprisen i Midt-Norge eit hopp, skriv NRK Møre og Romsdal. 

Klokka 14 var spotprisen 9 øre, medan dei var oppe i 28 øre då kabelen vart sett i drift. Seinare i ettermiddag er prisen venta å stige vidare. 

– Det er nok fleire faktorar, men det kan vere ei av årsakene, seier kraftanalytikar Tor Reier Lilleholt i Volue til kanalen om prishoppet. 

Den nye straumkabalen går mellom Aurland og Sogndal i Vestland og krysser Sognefjorden. 

Fleire i Midt-Norge har frykta høgare straumprisar når prisområde NO3 blei kopla til områda sørover. Årsaka er at prisane der har vore markant høgare enn lengre nord. 

Kraftanalytikar Tor Reier Lilleholt i Volue seier til NRK at han trur straumprisen i NO3-området kan auke med rundt 20 øre framover, og meiner det kan gjere det meir aktuelt for fleire å vurdere den nye Norgesprisen.