Utgiftene til velferd vil vekse meir enn økonomien

(NPK-NTB): Utgiftene til folketrygda vil auka raskare enn norsk økonomi det neste tiåret, ifølgje ein ny prognose frå Nav og Helsedirektoratet.

– At meir av verdiskapinga framover må brukast til folketrygda, kjem av at andelen eldre over 67 år aukar, og fordi det ligg an til svak vekst i befolkninga i yrkesaktiv alder, seier avdelingsdirektør i Nav Ole Christian Lien i ei pressemelding.

I fjor gjekk litt over ein tredel av statsbudsjettet til folketrygda - 736 milliarder kroner i 2026-kroner. Kostnadene har auka med 113 milliardar 2026-kroner frå 2015 til 2025. 

Utgiftene til folketrygda inkluderer dei fleste Nav-ytingane. I tillegg inngår utgifter til legemiddel, frikortordninga og andre helsetenester som blir forvalta av Helsedirektoratet.

– Som del av bruttonasjonalprodukt (BNP) for Fastlands-Noreg er utgiftene til folketrygda venta å auka frå 16,0 prosent i 2025 til 17,3 prosent i 2035, skriv Nav. 

Det betyr at ein auka del av verdiskapinga må brukast til å finansiera folketrygda. 

– Dersom heile auken i folketrygda skulle vorte finansiert gjennom høgare skattar, ville kvar skattytar i gjennomsnitt betalt 13.000 kroner ekstra i året, seier Lien.

(©NPK)