Utlånsvekst og auka sparing hos Nordea

(NPK-NTB): Nordea ser auka sparing blant kundane sine i andre kvartal i år. Samtidig hadde banken ein sterk utlånsvekst til hushald.

Konsernet enda i andre kvartal med eit driftsresultat på 1,7 milliardar euro, og hadde renteinntekter på 1,9 milliardar euro. Dei totale driftsinntektene enda på 3 milliardar euro, og resultatet etter skatt enda på 1,3 milliardar euro. Dette er på same nivå som andre kvartal i 2023.

Talet på kundar som ber om finansieringsbevis i Noreg har auka med 20 prosent frå same periode i fjor.

– Bustadmarknaden har starta året med svært sterk prisvekst, og vi har sett ein stor auke i talet på kundar som ber om finansieringsbevis. Utlånsveksten har auka mykje dei siste månadene, seier konserndirektør Snorre Storset i Nordea i ei pressemelding frå banken.

Storset fortel vidare at dei trur mange vil få auka kjøpekraft og at aktiviteten vil auke ytterlegare i siste halvdel av 2024 som følgje av stabil rente og ein prisvekst som har bevega seg nedover.

Banken ser samtidig ein sterk auke i innskot frå hushald, som har stige med 4 milliardar kroner gjennom andre kvartal. Dette svarer til ein auke på 11 prosent samanlikna med same periode i fjor. Samtidig ser banken ein høg etterspurnad for fondssparing.

–Trass i auka utgifter og stigande prisar, ser vi auka sparing både på innskotskontoar og i fond. Mange ser behovet for å sikre seg, men også eit behov for langsiktig sparing inn mot pensjonen, seier Storset.

(©NPK)