Regjeringa lanserer ei ny rekrutteringskvoteordning for 2022 som skal gi unge fiskarar kvotebonus, og set av eigne kvotar for å auke kvinneandelen.

– Med ei ny rekrutteringskvoteordning styrkar vi open gruppe si rolle som ein sentral rekrutteringsarena, seier fiskeri- og havminister, Bjørnar Skjæran, på Regjeringa sine nettsider.

I årets torskefiske har yngre fiskarar i open gruppe fått eit «ungdomstillegg» på fire tonn. For 2022 blir det i tillegg innført ei rekrutteringsrordning, der seks unge fiskarar i open gruppe blir gitt ein kvotebonus som gir eit kvotegrunnlag på 80 prosent av kvoten i lukka gruppe i ein periode på fem år.

– Med ungdomsfiskeordning, undervisnings- og lærlingekvotar, saman med ungdomstillegg og rekrutteringskvotar, har vi no eit nettverk av ordningar som skal legge til rette for unge å kome inn i fiskeria, seier Skjæran.

Det er òg gjort grep for å bidra til auka andel kvinner i fiskeria. Tre kvotar skal bli tildelt kvinner, og tre kvotar til menn. I tillegg er aldersgrensa for søking 40 år hos kvinner, medan den er 30 år for menn.

– Vi håper at fleire kvinner vel å vere fiskar i Noreg, slik at vi kan få ein betre kjønnsbalanse i fiskaryrket, seier Skjæran.