Gladmelding om ny drift ved Brødrene Aa

Brødrene Aa Eiendom etablerer ny drift ved verftsavdelinga i Eikefjord. Samtidig blir det jobba for ny oppstart ved verftet Hyen. Det kjem fram i ei pressemelding fredag. 

I meldinga frå Gustav Johan Nydal går det fram at Brødrene Aa Eiendom AS har etablert selskapet Eikefjord Slipp AS, som har kjøpt driftsmidlane ved verftet i Eikefjord i Kinn - og overtatt eigarskapet i Eikefjord Elektro AS.

– Saman vil dei to selskapa vidareføre verksemda innan ombygging og vedlikehald av passasjerbåtar», heiter det i meldinga. 

Nydal er styreleiar i Brødrene Aa og rådgjevar for Brødrene Aa Eigedom.

• Les fleire saker om Brødrene Aa-verftet

– Ei svært positiv utvikling
Rundt 170 ansatte i hjørnesteinsbedrifta stod uten arbeid då verftet gjekk konkurs i mai. Sidan har dei tidlegare eigarane jobba med å samle investorer for å starte opp drifta igjen. 

Den nye drifta i Eikefjord vil gi arbeid til opp mot 40 tilsette, i tillegg til innleigde ressursar. 

– Dette er ei svært positiv utvikling, og vi er glade for å kunne skape ny aktivitet og trygge arbeidsplassar i Eikefjord, uttaler Nydal.

Anstein Aa som var i leiinga i det tidlegare verftsselskapet, er dagleg leiar i Eikefjord Slipp.

Mål om oppstart i Hyen i august
Samtidig blir det opplyst at det går føre seg konkrete forhandlingar med investorar om å etablere eit nytt driftselskap for vidareføring av nybyggingsverksemda i Hyen i Gloppen.

– Arbeidet skjer i tett samarbeid med bustyrar og banken, og det blir no utarbeidd ein detaljert forretningsplan som grunnlag for å kjøpe driftsmidlane og starte opp att produksjonen, skriv Nydal. 

Han fortel at dei har tru på at det skal bli ny aktivitet både i Eikedalen og Hyen. 

 – Målet vårt er å få til ein oppstart i Hyen i løpet av august. Vi opplever stor interesse frå investorar, og mange har allereie vore på besøk og uttrykt stor begeistring for både bedrifta og produkta, uttaler Nydal i meldinga. 

Fekk kansellert rekordoppdrag
Tidleg i april vart det kjent at verftet vurderte å permittere tilsette, fordi Norled varsla at dei ville kansellere kontrakten på den første av tre båtar. 

Det utløyste krisa som enda med konkurs.

Etter kort tid kansellerte Norled kontrakten på alle dei tre båtane – som i si tid utgjorde ei rekordstor kontrakt for verftet.