Flakk vurderer ny søknad om gondol

For tre veker sidan kom avslaget frå regjeringa om å gi løyve til ei gondolbane til toppen av Sulafjellet. 

Primus motor for reiselivssatsinga, Knut Flakk, har likevel ikkje gitt opp å realisere det som kan bli regionens største reiselivsinvestering. 

– Vi håpar framleis at det kan bli noko av, men vi har ikkje konkludert om kva vi vil gjere, seier han til Nett No. 

Flakk Gruppen ønska å bygge ei bane frå Devoldfabrikken i Langevåg opp til Rundehornet. 

Eit stort fleirtal av lokalpolitikarane i Sula sa ja til planane – medan statsforvaltaren og fleire offentlege instansar protesterte.

Truleg ikkje aktuelt å ta saka til retten
Avgjerda frå kommunal- og distriktsdepartementet har sett ein stoppar for planane som til no har vore på bordet. 

Men Flakk har fleire moglegheiter for å realisere ein gondol i Sula. Ein av dei er å ta avslaget frå departementet til retten. 

Det meiner Flakk er eit lite aktuelt alternativ. 

Vil vurdere å endre søknaden
Men utbyggjarane kan også endre på planane og sende inn ein ny søknad. 

Protestane frå statsforvaltaren gjekk ut på at gondolbana i for stor grad var i strid med viktige natur, landskaps- og friluftsinteresser. Ei endring i utforminga kan gjere at ein kjem forbi ei slik innvending. 

– Det er mogleg å endre søknaden, og det er noko vi vurderer, seier Flakk. 

Samla effekt på 150 til 180 årsverk 
Gondolbana slik den var planlagt kunne frakta opptil 1200 passasjerar i timen opp til fjellet.

I tillegg vart det lag opp eit betydeleg service- og aktivitetstilbod ved både topp- og mellomstasjonane. Ein zipline og løype for skikøyring med natursnø, høyrde med i planane. 

Undersøkingar frå Flakk Gruppen anslår at satsinga vil gi ein direkte effekt på i overkant av  120 årsverk, i tillegg til ein indirekte effekt på ein plass mellom 30 og 60 årsverk. 

Nye tap ved Devoldfabrikken
Å få fart på besøket ved Devoldfabrikken i Langevåg har vore eit heilt sentralt motiv for Flakk Gruppen til å bygge gondol. 

Denne veka kom dei siste rekneskapstala som viser at eigarane haldt fram med å tape pengar i fjor.

For O. A. Devolds Sønner AS, som står for drifta av senteret, blei fasiten eit underskot før skatt på nær 15 millionar kroner i 2024. Driftsinntektene stoppa på knappe 20 millionar. 

Selskapet Devoldkantina AS gjekk også på eit tap før skatt på kring 3,3 millionar, etter å ha hatt driftsinntekter på 8,6 millionar koner (sjå tabellar under).

Flakk: – For lite besøkande
Begge selskapa på Devoldfabrikken har hatt minusresultat dei ti siste åra. 

– Både O. A. Devolds Sønner og Devoldkantina går dårleg. Årsaka er at det er for lite besøkande på senteret, og derfor har vi jobba med å utvikle gondolen for å trekke fleire folk hit, seier Knut Flakk. 

Om det ikkje blir gondol, er Flakk klar på at det vil bli ei nedbygging av Devoldfabrikken -  slik han tidlegare har åtvara om.

Spørjeundersøkingar mellom dei som driv på senteret i dag, viser at kring halvparten vil legge ned om gondolbana ikkje blir realisert. Nokre svara at dei vil halde fram drifta i eit redusert omfang.