Vil ha havvind utanfor Bergen

(NPK): Flytande vindturbinar i havet utanfor Bergen kan betre forsyningstryggleiken i bergensområdet og samtidig gi heile Vestlandet billegare kraft, går det fram av ein ny rapport.

Rapporten er laga av konsulentselskapa Multikonsult og Thema på oppdrag frå Equinor. Spørsmålet Equinor ville ha kasta lys over var korleis eit stort flytande vindkraftanlegg på 1 GWh i havet utanfor Bergen kan påverke kraftforsyninga i bergensregionen.

Konsulentane konkluderer med at utbygging av havvind kan gi tryggare forsyning av straum i bergensregionen. Havvindkraft kan også gi overskot som kan brukast i både gammal og ny industri og dessutan gi lågare kraftprisar på heile Vestlandet, skriv E24.

– Noregs vassdrags- og energidirektorat (NVE) har fått i oppdrag frå regjeringa å sjå etter nye moglege område for havvind. Dei bør prioritera å finna eit område like utanfor bergensregionen, seier fornybardirektør Pål Eitrheim i Equinor til avisa.

– Her er eit svært stort potensial, langt utover det som trengst i den norske kraftmarknaden, seier han.

Så snart tildelingskriteria er klare frå Olje- og energidepartementet, er Equinor no klare til å søkje om konsesjon for havvindutbygging på Utsira Nord, som er det første området som er opna for flytande havvind i norske havområde. Selskapet har også planar om å søkje konsesjon i Sørlege Nordsjø II, der botnfaste turbinar er meir aktuelt.

(©NPK)