100 søkarar på få timar

Subseafartøyet Rem Inspector har fått ein treårskontrakt med DOF og skal arbeide for Equinor på norsk sokkel. Rem Offshore søkjer no etter både styrmenn, maskinistar, kranførarar, matrosar, kokkar og forpleiningsassistentar.

Fartøyet blir henta heim frå Taiwan, der det har hatt oppdrag i havvind-bransjen. Skipet skal flaggast om til NOR-registeret og turnusordninga blir fire veker på og fire veker av.

Rem Offshore la ut jobbannonsen på rekrutteringsportelen Offshorecrew.no rundt 16:30 i går og delte den også på Facebook.

Så langt er det kome inn 100 søkjarar, seier mannskapssjef Dina Mari Remøy i Rem Offshore. Kombinasjonen av turnusordninga, at det er kort reiseveg til jobb og interessant oppdrag er årsaka til den store interessa, meiner ho.

Startar i første kvartal
Rem Inspector er eit subseafartøy bygd i 2013, som sidan 2019 har arbeid i havvindmarknaden med gangvegtenester og kommisjonering av havvindparkar.

Etter at skipet kjem til Noreg skal det gjerast mindre ombyggingar, mellom anna plasserast ein batteripakke ombord, før det byrjar i DOF-oppdraget i første kvartal neste år.

Rem Offshore satsar på subseamarknaden og skipet passar godt inn i den satsinga, seier dagleg leiar Lars Conradi i Rem Offshore.

Vekst og auka lønsemd
I fjor auka Rem Offshore-konsernet inntektene frå 841 til 1345 millionar kroner og resultatet før skatt frå 22 til 347 millionar kroner.

Reiarlaget driv ein flåte på 19 fartøy og har to under bygging.