20 år sidan siste minusresultat

Da NETT NO snakka med Båtbygg-sjef Kjell-Inge Sjåstad i fjor kunne han fortelje at dei hadde godt med arbeid utover 2022. Verftet styrte då mot ei tilsvarande omsetning som året før.

Han påpeika samtidig at det ville bli tøffare å få like lønnsam drift i 2022.

Både omsetning og resultat var eit knepp ned i 2022 samanlikna med året før. Verftet hadde likevel eit solid overskot før skatt på 15 millionar, som gjer at lønnsemda var på nivå med 2021.

Raudeberg-verftet leverer samtidig eit rekneskap med inntekter som er mellom dei høgaste i verftet si historie - 270 millionar (sjå tabell under).

Omsetninga er litt under det neste beste året til verftet i 2020, og litt ned frå 2021.

Den førebelse inntektstoppen kom i 2019 med ei omsetning på 379 millionar kroner.

Spente på prisutviklinga
I årsrapporten skriv leiinga at dei er spente på utviklinga på råvareprisar og leveringssituasjonen som følgje av Ukraina-krigen.

Dei merkar framleis auka konkurranse i marknaden for ombygging og reparasjon.

Årsaka er at fleire av både dei tradisjonelle nybyggingsverfta i Norge, og fleire verft internasjonalt, no også kjempar desse jobbane. Det gir igjen prispress frå utanlandske aktørar.

Nær 50 tilsette
Båtbygg-leiinga meiner likevel dei er godt rusta med gode fasilitetar på anlegget. I løpet av 2021 fekk dei også på plass ei ny tårnkran på heile 60 meter.

I underkant av 50 tilsette jobbar no ved Raudeberg-verftet.

Framleis er eigenkapitalen på solide 55 millionar og verftet har ikkje langsiktig gjeld.