Arctic Bioscience selde mindre helsekost

Arctic Bioscience leverte torsdag tal for 3. kvartal som viser betydeleg lågare inntekter i perioden.

Selskapet som har base i Hovdebygda, jobbar med å utvikle eit legemiddel basert på silderogn mot hudsjukdomen psoriasis. I tillegg lagar dei helsekostprodukt og det er salet av dei som gir inntekter til selskapet for tida.

Kvartalstala viser at inntektene stoppa på 4,8 millionar kroner i kvartalet – ein nedgang frå 9,3 millionar i same periode i fjor (sjå tabell under).

Selskapet skriv at nokre leveransar er utsett til 4. kvartal, og kanskje 2024. Ved utgangen av kvartalet låg dei samla salsinntektene til Arctic Bioscience på knappe 24 millionar – om lag som i fjor.

Opplever vekst i Kina
Ørsta-selskapet ser ei positiv utvikling for salet framover. I Kina har Romega-produkta vekse med meir enn ti prosent.

Salstala vil likevel ikkje bli spegla i tala til Arctic Bioscience, grunna lagerendringar hos deira kinesiske partnar.

Året inntektsvekst frå helsekostsegmentet blir difor redusert frå 30-35 prosent til berre 15-20 prosent, blir det opplyst i børsmeldinga.

Auka underskot – fleire tilsette
Underskotet før skatt og nedskrivingar (justert ebitda, journ. anm. ) i tredje kvartal var på 10,5 millionar.

Samla underskot ved utgangen av perioden var på knappe 29 millionar kroner.

Arctic Bioscience opplyser at auken i underskotet i hovudsak oppstår som følgje av auke i talet på tilsette.

Samtidig er tala inkludert effektar frå selskapet Arctic Algae som blei kjøpt i andre kvartal.

Bruttomarginen er på kring 34 prosent – som er i tråd med budsjettet, opplyser selskapet.

Ventar svar på psoriasis-studie neste år
Arbeidet med ein internasjonal studie av legemiddelet går samtidig vidare. Til no er kring halvparten av dei drygt 500 pasientane som skal delta i studien rekruttert.

Selskapet opplyser at rekrutteringa går godt, men seinare enn opplyst tidleg i 2023.

Ved førre kvartalsrapportering, anslo Arctic Bioscience at dei første resultata av studien vere klare i løpet av første halvår 2024. Det er framleis målet ved utgangen av 3. kvartal, opplyser selskapet.

Ein ny vitskapleg publikasjon publisert i september viser samtidig god effekt av psoriasisbehandling av silderognolje.