Arctic Bioscience ventar i spenning

Aksjekursen stupte frå 13 til 2,90 kroner aksjen då dei første resultata frå studien kom i fjor haust. Studien skal kartlegge Arctic Bioscience sitt silderognbaserte middel mot hudsjukdomen psoriasis.

Problemet var placeboeffekten - at alt for mange av testpersonane som berre fekk narremiddel - også oppnådde positive resultat.

Informasjonen som vart offentlegjort i fjor viste resultata eit halvt år ut i studien. Den varer imidlertid eit heilt år, og dei første resultata frå heile studien er venta innan utgangen av mars i år fortel selskapet i ei resultatoppdatering per 4. kvartal

Les børsmeldinga her (ekstern lenke)

Før børsopning torsdag er kursen 3,36 kroner.

Auka inntektene
Arctic Bioscience starta opphavleg som ein helsekostprodusent, også det basert på silderogn, før det også byrja å satse på legemiddelutvikling.

Det er helsekostproduksjonen som står for salsinntektene til selskapet og dei auka kraftig i fjor, der mykje av veksten kom i 4. kvartal (sjå tabell).

Selskapet arbeider og med å utvikle eit potensielt legemiddel for å hjelpe hjerneutvikling hos ekstremt tidlegfødde barn.

Eigarar på Nordvestlandet
Arctic Bioscience har hovudkontor og produksjonsanlegg i Hovdebygda i Ørsta, med ei rekke investorar på Nordvestlandet som medeigarar. 

Blant dei er Halsebakk-familiens selskap Ronja Capital og Vartdal Plast-eigarane Jan Endre, Sindre og Ingvild Vartdal.