Børsdagen: Mykje raudt -med eitt unntak

Frustrerte Havila Kystruten-aksjonærar fekk seg ein opptur fredag ettermiddag då selskapet kunne melde at ein har overtatt Havila Castor, og eig skipet sjølv.

Aksjekursen spratt opp 4,1 prosent til 18,90 kroner aksjen. Dette prisar Herøy-selskapet til 898 millionar kroner.

Om no alt går etter planen kan Havila Castor starte på jomfruturen 10. mai, berre fem dagar etter at skipet er planlagt å kome til Bergen.

Vil kutte russiske band
Der ligg enno Havila Capella i sanksjonsopplag. Havila Kystruten opplyser at det vert jobba med å finne ei løysing også for dette skipet, slik at reiarlaget kuttar alle band til russiske selskap.

Havila Kystruten opplyser at Havila Castor har ein marknadsverdi på rundt 1,2 milliardar kroner, og er finansiert med eigenkapital og eit lån på 46 millionar euro frå Tersan skipsverft og verftet sin tyrkiske bank. Lånet er for ein periode på tre månader.

Havila Castor vert eigd av selskapet HK Ship V AS – eit 100 prosent eigd dotterselskap av Havila Kystruten Operations AS.

Forhandlar om ny låneavtale
I ei heilt anna retning gjekk aksjekursen til oppdrettsselskapet Atlantic Sapphire, sjølv om aksjen tok seg litt inn på slutten av dagen.

Sluttkursen enda på 29,40 kroner, ned 2,0 prosent.

Atlantic Sapphire arbeider med å få forlenga og endra dagens låneavtale, melder selskapet i årsrapporten for 2021, som blei lagt fram etter at børsen stengte i går ettermiddag.

Målet er å vere ferdig innan 30. juni i år.

Ein ny avtale er venta å omfatte forlenga sluttdato for avtalen, nye vilkår og tilgang på ytterlegare lån, ifølgje årsrapporten.

Les børsmelding her

Råka av brann
Atlantic Sapphire driv landbasert oppdrett ved Miami i USA og i Danmark. Selskapet er børsnotert, med det formelle hovudkontoret i Vikebukt.

Anlegget i Danmark blei skadd av ein brann i fjor, og selskapet vil ta stilling til vidare drift der seinare i år.

I USA planlegg selskapet andre byggesteg på anlegget ved Miami, ei investering på 225 millionar dollar. Planen er å sette ut fisk der i tankane i andre byggesteg neste år.

Treng meir pengar
Atlantic Sapphire hadde eit samla netto underskot på 132,8 millionar dollar i fjor, eller nær 1,2 milliardar kroner.

Inne i underskotet er ei nedskriving på 34,8 millionar dollar, etter at selskapets oppdrettsanlegg i Danmark brann ned.

No trur Norse Securities at Atlantic Sapphire må hente inn meir pengar i nær framtid. Meklarhuset trur at det vil vere behov for å hente inn minst 100 millionar dollar for å finansiere den planlagde utbygginga av anlegget i Florida.

Innsidehandel frå Vartdal
Lenge låg Arctic Bioscience i toppen på taparlista ferdag, men henta seg kraftig in n heilt på tampen, og fall 2,0 prosent til 17,00 kroner aksjen.

Det hjalp dermed ikkje på kursen at det Jan Endre Vartdal-tilknytta selskapet Vartdal Holding torsdag kjøpte 25.000 aksjar i Arctic Bioscience til ein snittpris på 17,441 kroner aksjen. Etter kjøpet har Vartdal Holding 1,027,755 aksjar i Arctic Bioscience.

Vartdal Holding er eigd 33,33 prosent av Jan Endre Vartdal-selskapet Future Invest. Jan Endre Vartdal er styremedlem i Arctic Bioscience.

Totalt sit Jan Endre Vartdal og personar nær knytt til han med 1,831,356 aksjar i selskapet.

I tillegg til Havila Kystruten, enda Havila Shipping og Statt Torsk i pluss. For resten av selskapa i nordvest var det raude børstal.

Hovedindeksen på Oslo Børs fall 1,7 prosent til 1.263,88 poeng fredag.

Oljeprisen var ved børsslutt ned 1,0 prosent til 107,31 dollar.