Auka investeringslyst i utlandet
Forslaget om lakseskatt har sett fart på interessa hos investorar for landsbasert satsing i utlandet, fortel Endúr i siste kvartalsrapport.
På kort sikt skaper ekstraskatten på oppdrettsnæringa som regjeringa vil innføre større uvisse, men på lengre gir den nye sjansar for fiskeoppdrett på land, skriv Endúr kvartalsrapporten.
Det største selskapet i konsernet er Artec Aqua i Ålesund, som teiknar og prosjekterer landbaserte oppdrettsanlegg, frå smoltanlegg til anlegg der fisken lever heile livet i tankar på land.
Artec Aqua har mellom anna oppdraget med å teikne og prosjektere Salmon Evolution sitt anlegg på Indre Harøy i Romsdal, som i tredje kvartal i år sende sin første laks til slakting. Artec Aqua har i år også fått jobben med å teikne og prosjektere eit landbasert anlegg på Island.
Den auka skatten på oppdrett som regjeringa vil innføre skal ikkje omfatte oppdrett på land.
Innan utgangen av 2024 skal Endúr ha fire milliardar årlege driftsinntekter, ifølgje kvartalsrapporten.
Veksten skal kome både ved vekst hos bedriftene som er ein del av konsernet i dag og ved kjøp av nye verksemder, skriv Endúr i kvartalsreknskapen for 3. kvartal.
I 2021 hadde industrikonsernet 2,1 milliardar kroner i driftsinntekter.
Endur ASA | ||
| Pr. 3. kvartal. I mill. kroner | 2022 | 2021 |
| Driftsinntekt | 1842,2 | 1522,5 |
| Driftsresultat | 76,2 | -15,2 |
| Resultat før skatt | 12,6 | -101,3 |
| Endur ASA | ||
| 3. kvartal. I mill. kroner | 2022 | 2021 |
| Driftsinntekt | 592,6 | 567,7 |
| Driftsresultat | 31,3 | 30,0 |
| Resultat før skatt | 10,8 | -9,1 |
Publisert: 18.11.2022 08:35
Sist oppdatert: 18.11.2022 10:04