Bano satsar på privatmarknaden

Bano Group på Sandane fekk i sommar det nederlandske investeringsfondet Waterland Private Equity inn som ny majoritetseigar og varsla kraftig vekst. No har Bano Group gjort sitt første kjøp etter at investeringsfondet kom inn som medeigar.

Det er selskapet Bardum, med hovudkontor på Langhus i Ski kommune, som er kjøpt. Betalinga er dels kontant og dels aksjar i Bano Group seier medgrunnleggar og medeigar Roy El Sayed i Bano Group. Partane har avtalt å ikkje opplyse kva Bardum er verdsett til i transaksjonen.

Medan Bano Group har institusjonar som hovudkundar for baderomsinnreiingane sine er det privatmarknaden som er størst for hjelpemiddeldistributøren Bardum. Målet er at begge selskapa skal dra nytte av kvarandre sine salskanalar etter oppkjøpet.

Bano blei skipa av Roy El Sayed og Torbjørn Gisle Olseth i 2000.

I 2006/2007 kjøpte dei Strukturplast på Sandane i Gloppen kommune for å få styring på produksjonen av viktige delar til baderomssystemet, og gradvis er meir og meir av aktiviteten i selskapet flytta til Sandane.

Under Bano Group er det tre datterselskap, Bano og Strukturplast på Sandane og Probad i Sverige. I 2020 hadde konsernet 331 millionar kroner i driftsinntekter og 50 millionar kroner i resultat før skatt.

Bardum hadde 97 millionar kroner i driftsinntekter og eit resultat før skatt på 11,5 millionar kroner i 2020.

Etter at Waterland kom inn på eigarsida sa konsernsjef Frode Lindvik at målet var å vekse ut i den europeiske marknaden og bli fem gangar større. Det vil bety over 1,5 milliardar kroner i driftsinntekter, og fleire tilsette - også på Sandane.