Ber Sanner forlengje krisehjelp

(NPK-NTB-Kristian Skårdalsmo): For å unngå at norske bedrifter bukkar under i sluttfasen til pandemien må regjeringa allereie i januar forlengje kompensasjonsordninga, krev NHO.
– Dersom vi ikkje får behalde ei føreseieleg ordning, risikerer vi at vi mistar bedrifter. Det vil koste storsamfunnet meir enn det vil koste å gi kompensasjon til bedriftene som blir ramma av smitteverntiltaka.
Det seier NHO-sjef Ole Erik Almlid i ei skarp nyttårsåtvaring til regjeringa og finansminister Jan Tore Sanner (H).
– Vi må sikre at vi har ei kompensasjonsordning som reddar dei som vi kan vi kan redde, seier han.
Dagens breie ordning for koronaramma bedrifter gjeld til 1. mars. Kjernen i ordninga er at bedrifter med kraftig omsetningsfall målt mot 2019 får dekt faste, uunngåelege kostnader.

«Krevjande haust»

Almlid ber om at dagens ordning blir forlengd, og at ein framleis samanliknar med omsetninga i 2019.
I eit brev til Sanner og næringsminister Iselin Nybø (V) skriv NHO at hausten 2020 vart krevjande for mange, «med stor usikkerhet om hvorvidt en bred kompensasjonsordning ville komme på plass».
«NHO mener derfor at regjeringen allerede i januar bør beslutte videreføring av kompensasjonsordningen så lenge tiltak for å håndtere pandemien hindrer normal forretningsdrift,» heiter det.
Almlid viser til at temaet for årets NHO-konferanse torsdag er jobbskaping.
– Då må vi i alle fall ikkje miste dei bedriftene vi har, når vi skal ut av denne krisa, seier han til NTB.
– Vi trur ikkje dette går over brått, over natta. Det kjem til å ta lang tid å få vaksinert nok folk, og vi må rekne med smitteverntiltak òg etter 1. mars.

Vil ha justeringar

Det er framfor alt eit behov for føreseielegheit som ligg bak kravet til Almlid. Han ser heller ingen økonomisk risiko forbunde med å forlengje ordninga.
– Dersom det viser seg at det ikkje er behov, er ordninga sett saman slik at det ikkje blir noko utbetalt. Terskelen på 30 prosent omsetningsfall ligg i botn, seier han.
NHO foreslår òg å justere ordninga på fleire måtar.
«Ordningen bør inkludere smittevernkostnader for å stimulere til økt aktivitet», heiter det i notatet.
Arbeidsgivarorganisasjonen ber samtidig regjeringa ta inn kansellerte ordrar i utrekninga av omsetningsfall. NHO meiner òg ei eiga ordning for vekst- og gründerselskap må vurderast.
Vidare ber NHO regjeringa gjere noko med skeivskapar i dagens ordning. Likebehandling uavhengig av organisasjons- og finansieringsform og erstatning for tapte innsatsfaktorar er blant stikkorda.

Sanner lovar meir

Finansministeren seier regjeringa jobbar med ulike modellar for meir krisehjelp etter 1. mars. Løftet hans er at dei økonomiske tiltaka, både for arbeidstakarar og bedrifter, kjem til å vare så lenge krisa varer.
Sanner understrekar samtidig at han ikkje deler ei oppfatning om at kompensasjonsordningane skal vare så lenge krisa varer.
– Det er eg usamd i, fordi kompensasjon er tiltak som er tilpassa ein situasjon med strenge smitteverntiltak, ein situasjon der økonomien er lukka ned, sa han til NTB rett før jul.
– Når vi byrjar å lette på smitteverntiltaka, er det andre typar tiltak som er riktig og viktig. Då er det aktivitet som skal stimulerast.
Sanner gir nervøse vintersportsstader og andre denne garantien:
– Det dei kan vite, er at dersom vi er i ein krevjande smittevernsituasjon, kjem vi til å vidareføre kompenserande tiltak.
I 2021 er 40 milliardar kroner sette av til mellombelse koronatiltak, på toppen av eit budsjett som er skrudd inn mot å skape aktivitet i økonomien.
(©NPK)