Betydeleg betring for Stadyard

Torsdag kom nyheita om at Stadyard-verftet ved Raudeberg skal bygge ein ny linebåt for det færøyiske reiarlaget P/F Regn. 

Etter det verftet kjenner til, er det ikkje bestilt andre slike fartøy for bygging i Norge på lang tid. 

Dagleg leiar og storaksjonær Agnar Lyng er naturleg nok glad for kontrakten som vil sikre godt med arbeid fram mot sommaren 2028.

– I ei tid der det ikkje er like opplagt at kontraktar for bygging av nye fiskefartøy går til Norge, er vi svært glade og stolte for tilliten Anfinn Olsen og hans familie viser oss ved å legge dette prosjektet til Stadyard, uttaler Lyng i ei pressemelding.

Skroget skal byggjast i Polen før utrustninga ved Stadyard. Fartøyet skal leverast sommaren 2028. 

Om bord blir det fleire leveransar frå selskap i regionen. Førebels er det mellom anna klart at gir- og propellanlegg kjem frå Finnøy Gear & Propeller. 

Rekordoverskot i fjor
Lyng fortel at verftet kjem frå eit godt fjorår med ei omsetning på nivå med 2024. 

Det året sørgja for det største overskotet sidan toppåret 2014 – og 2025 blei betre, fortel han. 

– Vi enda med eit overskot før skatt på drygt 10 millionar. Vi er godt nøgd med det resultatet, seier Lyng til Nett No. 

Eit slikt overskot har ikkje verftet hatt nokon gong tidlegare. 

– Har fullt opp fram til sommaren
Verftet har dei siste åra drive innan reparasjon, vedlikehald og ombygging. Lyng fortel at dei har godt med arbeid framover. 

– Vi har fullt opp fram til sommaren og det startar å kome på plass oppdrag i tredje kvartal. Det er bra med vår type drift, legg han til. 

Aktiviteten gjer at verftet no har i underkant av 50 faste tilsette. I tillegg er arbeidarar frå ulike underleverandørar og spesialfirma innom verftsportane. 

Oppdrag på fiskeri og oppdrag
For augneblinken har dei ringnotsnurparen Andrea L inne til ombygging av styrhus og dekk. Fiskebåten er eigd Babord Catch-reiarlaget, der Lyng er på eigarsida. 

Trålaren Adenia er også inne for ombygging utover våren. Samtidig har verftet hatt oppdrag mellom anna med fleire større servicefartøy for havbruksnæringa som har vore inne til ombyggingar.

Agnar Lyng er dagleg leiar og hovudaksjonær i verftet via Babord Industries. Malvin Silden, Knut Helge Sørpoll og Trond Kongshaug er også medeigarar via Verlo Holding.