Boutique-hotell snudde minus til pluss

Blåtind Boutique Hotel i Stordal snudde eit underskot til overskot i løpet av fjoråret.

2023-rekneskapen viser ei omsetning tett oppunder ti millionar kroner, som er på nivå med rekordinntektene i 2022. Samtidig satt hotellet att med eit resultat før skatt på ein kvart million (sjå tabell under).

– Vi kom oss så vidt gjennom koronapandemien også fekk vi litt utfordringar i 2022. Men vi klarte å snu det i fjor, fortel dagleg leiar Ole Stavdal Vikenes til Nett No.

Han er 2. generasjon i familiebedrifta i Røysetdalen langs «turistløypa» mellom Geiranger og Trollstigen.

– Betre sommar i år
Pilane har heldt fram å peike oppover i årets sesong, ifølgje Vikenes.

– Vi hadde ein betre sommar i år, enn i fjor, og jobbar heile tida med å tilby fleire gode opplevingar som igjen gjer at gjesten bur i fleire dager. Dette fører til at kvar gjest legg igjen meir pengar enn tidlegare, legg han til.

Vikenes fortel at det er tøffe prioriteringar for å tene pengar i ein bransje som er prega av låge marginar. Samtidig har dei opplevd ei kraftig auke i aktiviteten og omsetninga er meir enn dobla sidan før pandemien.

– Vi nærmer oss julebordsesongen og har dei første juleborda allereie i oktober. Haustsesongen er viktig dersom vi skal klare å bikke 10 millions-målet vårt, seier Vikenes.

Fleire år som Gaselle-bedrift
Veksten har mellom anna ført til at hotellet i fleire år har vore Gaselle-bedrift – ei kåring av vekstbedrifter i regi av Dagens Næringsliv.

ؘ – Det er vi stolte av, seier Vikenes.

Hotellet har overnattingsplass til kring 60 personar i suitar av ulik storleik og leilegheiter. Dei har også eigen restaurant som er bygd som ei gammal vikingløe.

Saman med kona Christine Olsvik, driv Vikenes også Petrines Gjestgiveri i Dalsbygda. Her har dei nettopp lukka dørene for sesongen, og dei tilsette er henta over til Blåtind der dei satsar på heilårsdrift.