Bryllaupshotellet la bak seg kanonår

Hotel Union Geiranger hadde eit rekordår på alle måtar i fjor. Omsetninga steig til nye høgder og overskotet har aldri vore høgare enn etter 2023.

Etter at hotellet for første gong bikka 100 millionar i inntekter i 2022, haldt veksten fram i fjor med ei omsetning på 131 millionar.

Ei resultat før skatt på nær åtte millionar, har hotellverksemda ikkje vore i nærleiken av tidlegare (sjå tabell under).

Med andre ord er det eit vertskap som har det økonomiske på stell, som tek i mot prinsesse Märtha Louise og Durek Verrett til giftarmål på hotellet den 31. august.

Ekteparet og hotelldrivarane Monja og Sindre Mjelva har fått mange spørsmål kring bryllaupet den siste tida – som dei i stor grad ikkje har kunna svara på.

Tidlegare i år fortalde Union-vertskapet om bakgrunnen for veksten.

I kjølvatnet av koronapandemien snudde dei seg om, frå å vere eit hotell som baserte seg på store bussgrupper, til å vere eit hotell med individuelle reisande som den største gruppa.

Det har gitt ein vekst i omsetninga på kring 50 prosent sidan før pandemien.

Frå 25 til fleire enn 60 heilårstilsette
Hotellet er fleire gonger trekt fram som førebilde innan reiselivsnæringa, med satsing på lokal verdiskaping og busetting.

Union-hotellet har satsa målbevisst mot heilårsdrift og fleire faste arbeidsplassar. Det har også gitt resultat.

Før pandemien hadde hotellet kring 25 heiltidstilsette, medan dei ved utgangen av 2023 sysselsette 63 årsverk – opp ti frå året før.

Kåra til årets bedrift i Møre og Romsdal
Medan store delar av indre Sunnmøre slit med fråflytting, har pilane peika motsett veg i Geiranger. Det siste året har innbyggjartalet i turistbygda i Stranda auka.

Mjelva understreka at hotellet har lagt ned ein betydeleg innsats for å kome dit dei er i dag, mellom anna med å bygge nye bustader til dei tilsette.

Tidlegare i år blei hotellet kåra til årets bedrift i Møre og Romsdal fylke.

– Det er kjekt å sjå at det nyttar, sa hotelldirektør Monja Mjelva frå talarstolen då ho tok i mot prisen saman med ektemannen Sindre.

Konsernrekneskapen for eigarselskapet SM Buick Holding er ikkje klar enno.