Dristig satsing ga rakettvekst og fleire tilsette

Grande Fjord Hotel har lagt bak seg fleire år med ei storstilt satsing der dei har spissa drifta inn mot betre betalande gjestar enn før.

No har dei starta å sjå resultata. Den samla omsetninga i fjor var om lag tre gongar høgare, samanlikna med før dei tok avgjerda.

– Rekneskapa våre er prega av at vi har vore gjennom krevjande byggeperiodar, med negativt resultat to år på rad. Men det vil betre seg framover, og no skal vi begynne å tene pengar, fortel hotellsjef Aleksander Grande til Nett No.

Spent på bryllaups-effekten
Aleksander Grande og faren, Odd Kenneth Grande, er den sentrale duoen i drifta av det familieeigde hotellet i utkanten av Geiranger sentrum.

Helgas store hending - bryllaupet mellom Märtha Louise og Durek Verret - har gitt enorm omtale og merksemd for turistbygda. Det har også gitt fullt hus hos Grande i helga, som er mellom hotella som har gjestar til prinsessebryllaupet.

Førebels har dei ikkje merka noko auke i bookingane, men hotellsjefen er spent på langtidseffekten.

– Det er veldig kult om Geiranger kan bli ein bryllaupsdestinasjon, og at vi kan få ein boost på den marknaden. Nettopp slike selskap og firmagrupper er noko som passar oss godt, seier Grande.

Sa nei til bussgrupper og dobla romprisen
I løpet av dei siste åra har Grande Fjord Hotel investert meir enn 50 millionar i nye luksussuitar, serverings- og konferanselokale - og eit eige brenneri.

– Vi tok eit val i 2017. Då bestemte vi oss for å pusse opp hotellet, seie nei takk til bussgrupper, doble romprisen og sjå kva som skjedde. Det var ei kjempesatsing for eit lite hotell som oss, og vi visste ikkje korleis det ville gå, seier Aleksander Grande.

Lokale leverandørar som Slettvoll Møbler, Måndalen Trevare og Wonderland på Åndalsnes, har sørga for å få fram den eksklusive «boutique»-kjensla.

– Vi satsa mot enkeltreisande, og auka både prisane og kvaliteten på produktet, legg han til.

Fleirdobla omsetning
Gjestane har tydeleg sett pris på endringane, og har halde fram å strøyme til hotellet.

Eit tilbakeblikk på rekneskapstala illustrerer godt auken. For ti år sidan omsette reiselivsbedrifta for 5-6 millionar årleg. Etter ei første runde med investeringar, auka omsetninga til meir enn 13 millionar i 2019.

2023-rekneskapen er ikkje levert enno, men den samla omsetninga for fjordhotellet og det nystarta Geiranger Brenneri-selskapet, enda på kring 30 millionar.

– Har bygd brenneriet som eit showrom
Brenneriet skal i tillegg til å drive serveringsplassen «Berserk Bar og Grill», ha eigen produksjon, i første omgang av gin. Å kome inn i hyllene til Vinmonopolet er også ein draum for brenneriverksemda, sjølv om nålauget er trongt.

– Vi har bygd brenneriet som eit showrom, der gjestane kan kome på besøk, få smake og høyre om norsk brennevin – ikkje minst gin som no gjer det veldig bra internasjonalt, fortel Grande.

– Men det skal vere eit mikrobrenneri, og vi skal ikkje ha ein produksjon i stor skala for å tene store pengar, legg han til.

Forlenger sesongen
Omlegginga av drifta i reiselivsbedrifta har også eit vidare mål om heilårsdrift. Tradisjonelt har dei fleste overnattings- og serveringsverksemdene i Geiranger halde ope ein hektisk sesong frå mai til september.

Slik har det óg vore for Grande Fjord Hotel, men i år skal dei iallfall halde ope til jul.

– Målet er å halde ope så lenge vi klarer. Januar og februar kan til eksempel vere gode månader med bedrifter som ønsker å samlast, medan mars og april har vore den tyngste perioden til no, fortel hotellsjefen.

Fleire faste tilsette
Med høgare omsetning har det vore mogleg å ha fleire personar i arbeid. Tidlegare ga drifta gjerne arbeid til ti sesongtilsette, i tillegg til Grande og faren.

– No er det noko heilt anna. Vi er oppe i 25 tilsette i høgsesongen, samtidig som vi har ein base med faste tilsette på heilårsbasis. Det er noko vi ikkje har hatt før, og det gir oss større moglegheiter, seier Grande.

– Med våre 46 rom er vi framleis eit sopass lite hotell at det ikkje trengst ei stor bemanning for å halde ope ei helg, om ei bedrift til eksempel ønsker å ha hotellet for seg sjølve, fortel han.