Bur seg på langvarig krisehandtering

Neste år blir det store kutt i torskekvotane for tredje år på rad.

Både fiskeindustri og fiskarar er bekymra for skadeverknadane. Mindre fisk betyr reduserte inntekter og trugar arbeidsplassar både på sjøen og i industrien på land.

Lovar tiltak raskt
Fiskeriminister Marianne Sivertsen Næss deltok på fiskeri- og havbrukskonferansen i Måløy i dag. Ho lovar tiltak raskt.

-Det er eit arbeid som pågår og som nok sannsynlegvis vil vere ein situasjon vi vil måtte følge tett også i tida framover. Og så håpar eg vi skal kan kome med nokre tiltak som vil kunne vere til hjelp ganske raskt, seier ho til Nett No.

Samstundes understrekar ho at vi må bu oss på at nedturen kan bli langvarig.

- Som sagt, dette er ein situasjon som fort kan gå ut i 2026-2027 før det begynner å snu. Eg vil ikkje konkludere med å seie at no har eg gjort jobben og at dette var det vi kom med. Eg ønskjer å vere i tett dialog med næringa, få fortløpande innspel og få vurdert situasjonen til ei kvar tid, seier ho.

Forstår CO2-avgift-kritikk
Tidlegare i haust sa Sivertsen Næss til Nett No at ho forsto kritikken frå fiskarhald mot CO2-avgifta på drivstoff og den planlagte avgiftsauken fram til 2030. CO2-avgifta skal stimulere fiskarane til å gå over til energikjelder som reduserere CO2-utsleppa

Avgifta fordyrar fisket. Når inntektene for den delen av fiskeflåten som fiskar torsk og andre fiskeslag går ned blir avgiftsauken ekstra tyngande.

– Vi har ikkje teknologien tilgjengleg. Det er ikke like enkelt for den næringa å gjere dei grepa som trengs for å omstille seg. Det er ei sak eg kjenner godt. Det er blant anna difor vi har CO2-kompensasjonsordninga også, fordi det her er ei kjent problemstilling. Eg kjem til å jobbe for å sikre at denne næringa skal vere lønsam framover, og det er kanskje viktigare enn nokon gang med den kvotenedgangen vi står overfor, sa Sivertsen Næss.