Børsdagen: Berre hovudkontoret att på Nordvestlandet

Sjå børstabell for Nordvestlandet under

På hovudkontoret i i Horisontbygget i Herøy har Eqva-sjef Erik Høyvik tre kollegaer. Resten av verksemda er ved Sognefjorden og i Sunnhordland. Bedriftene der har tilsaman over 400 tilsette. Der bur også majoritetseigarane.

Denne situasjonen gjer at mange lurer på om hovudkontoret blir verande i Herøy.

Kvar firmaadressa skal vere i framtida kunne han ikkje svare på, men samstundes er flytting av hovudkontoret ikkje eit tema hos majoritetseigarane, fortalde Høyvik då han presenterte Eqva på eit møte i Fosnavåg Shippingklubb mandag.

Eqva er eit resultat av fleire prosessar:

• Refinansieringa og reorganiseringa av Havyard Group, der fire datterselskap blei skilt ut og børsnoterte som Hav Group.
• Etter den operasjonen omfatta aktiviteten i Havyard Group berre skipsverftet i Leirvik i Sogn, der drifta vart langt om frå nybygg til reparasjon og vedlikehald og arbeidsstokken kutta frå omlag 170 til 70.
• I mai 2022 kjøpte Havyard Group alle aksjane i HG Group og blei eigar av BKS Holding og Fossberg Kraft. Mykje av oppgjeret skjedde med aksjar i Havyard Group, slik at seljarane - Tore Thorkildsen, Gudmund Øvrehus, Even Matre Ellingsen og Skarvelandfamilien - blei dei nye storeigarane.
  
• Tidlegare storaksjonær Havila Holding eig no 13,89 prosent. I tillegg eig søskena og Havila Holding-aksjonærane Njål, Hege og Vegard Sævik tilsaman 5,37 prosent i Eqva gjennom sine private selskap.
  
• Havyard Group vedtok namneskifte til Eqva i fjor.

Med denne transaksjonen vart skipsverftet i Leirvik på ny ein del av eit større selskap, samstundes som dei nye storaksjonærane fekk børsnotert si verksemd.

I tillegg til skipsverftet omfattar Eqva BKS Industri (Sunde i Kvinnherad), BKS VVS (Bergen), Zenit Engineering (Sunde), Marine Support (Storebø i Austevoll), BKS Power and Automation (Sunde) og Fossberg Kraft.

Store på elektroinstallasjonar
Selskapet er store på levering av tekniske installasjonar, elektro og automasjonstenester og byggjer og driv småkraftverk gjennom Fossberg Kraft.

I år ventar Eqva å nå 600-700 millionar kroner i driftsinntekter og eit driftsresultat før av- og nedskrivingar (ebitda) på 4-6 prosent av driftsinntektene (24-42 millionar kroner).

Målet er å vekse
Planen og målet er å at Eqva skal vekse, både ved at dagens selskap i konsernet får fleire oppdrag, men og ved oppkjøp og transaksjonar som innlemmar nye selskap i konsernet, seier Høyvik.

Der ligg nøkkelen til at Eqva kan bli eit selskap med meir enn hovudkontoret på Nordvestlandet.

Nest lågaste kurs tysdag
Den dagen Havyard Group/HG Group-transaksjonen blei offentleggjort i mai i fjor var børskursen 3,24 kroner aksjen. 15. juni 2022 nådde aksjekursen 4,55 kroner.

Tysdag fall Eqva-aksjen fem prosent, til 2,85 kroner. Det er nest lågaste kurs sidan Havyard Group/HG Group-transaksjonen og verdset selskapet til 205 millionar kroner.